نفسى اشوفك يارب "كلام من القلب للقلب"

[الداعية هبه الحمزاوى]

السلام عليكم ورحمة الله وبركاته



أخوتى فى الله كيف حالكم مع الله؟ ثم كيف حالكم مع أنفسكم؟


أسأل الله العظيم أن تكونوا بخير وسلام





اليوم سنتحدث بإذن الله عن موضوع فى غاية الأهمية، موضوع يمسنا جميعاً ألا وهو "نفسى أشوفك يارب"


فلنبدأ الدرس بإذن الله فكونوا معى:





اكيد لسه بتدور على حاجة تغيرك صح؟


واكيد كتير مننا نفسه يتغير بس مش لاقى حاجة تحفزه الا من رحم ربى


خليك معايا وتابع كلامى بس لازم تعرف كويس ان اهم حاجة "الصدق" فالازم تخليك صادق مع نفسك ومعايا من البداية ولو انت عايز بجد اكيد هاتوصل ان شاء الله


الحل دلوقتى فى 4 كلمات :"نفسى اشوفك يا ربى"


انا مشتاقة لربنا وانتى كمان مشتاقة لربنا صح ولا لأ؟


صح طبعا مهما كانت ذنوبى انا نفسى اشوفه مهما كنت مقصر نفسى اشوفه طيب وبعدين الكلام ده هاينفعنى بأيه؟


اقولك هاينفعنا كلنا بايه


اصل انت مش فاهم المعنى ده لو سيطر على قلبك بصدق تأكد ساعتها انك هاتكون حد تانى خالص


جسم فى الدنيا عايش للعبادة وقلب طااااااااااير فى السماء بيحلق حول العرش


بتسجد عالارض وكانك ساجد عند سدرة المنتهى


اصلنا عشان نشتاق لربنا سبحانه وتعالى لازم نحبه عشان لما نحبه هانعوز نشوفه ونقابله ونقربله بس عشان نحبه اساسا لازم نعرفه زى ما بيقولوا تعرف فلان يقولك عز المعرفة ولله المثل الاعلى انا بس بديك مثال للكلمة اللى قلتها


المهم يبقى ظهر لنا دلوقت معادلة ايه هى


معرفة+محبة+شوق=قرب عالترتيب


يبقى اول حاجة ايه؟ معرفة تعرفه الاول، طيب هاتسألنى اعرفه ازاى يعنى مانا عارفه؟


انك تعرف اسمائه وصفاته


حد هايطلع دلوقتى يقولى احنا شبعنا من البقين دول محدش حاسس بحد ولا حد بينفذ ويبقالك بكلام لو حد بينفذه اصلا


اصلكم شوية شيوخ فكرين نفسكم ملايكة


هاقوله لا احنا بشر ومعرفناش الكلام ده الا لما قرأنا وذاكرنا وتعبنا عشان نعرفه ولسه كمان هانعرف اكتر ماحنا موصلناش لقمة العلم يعنى محدش فينا محمد صلى الله عليه وسلم


المشكلة يا اخى اننا للاسف مش بنعيش المعانى دى بقلوبنا فبتتحول بالنسبة لنا مجرد كلام بس الا من رحم الله


لكن يا اختى النهارده عايزين ننظر للمعانى بقلوبنا عايزين ننظر ليها نظرة تانية نشوف الكلام ده بصدق


اقرأ معايا:{يَوْمَ تَجِدُ كُلّ نَفْسٍ مّا عَمِلَتْ مِنْ خَيْرٍ مّحْضَراً وَمَا عَمِلَتْ مِن سُوَءٍ تَوَدّ لَوْ أَنّ بَيْنَهَا وَبَيْنَهُ أَمَدَاً بَعِيداً وَيُحَذّرُكُمُ اللّهُ نَفْسَهُ وَاللّهُ رَؤُوفُ بِالْعِبَاد}


وهنا قف معى عند {وَيُحَذّرُكُمُ اللّهُ نَفْسَهُ} حس بيها كده وشوفها هاتعمل ايه فى قلبك شوف اد ايه عظمة الله سبحانه وتعالى ياااااااااه استشعر عزته اد ايه وجبروته اد ايه


وبعدها ادخل عالكلام اللى بعدها {وَاللّهُ رَؤُوفُ بِالْعِبَادِ} وحس بمدى حب الله لينا ورحمته بينا شفت ربك اد ايه جميل شفت اد ايه انت غالى عنده


مين ده انا؟ انا غالى عند ربنا انا؟


ايوة انت وانا وعباده كلهم


العصاة والفاسدين والمفسدين؟ ايوة كلهم عباده ولو تابوا هايتوب عليهم ان شاء الله


يا سيدى استشعر كلامه وحس بيه هاتلاقيه والله العظيم كلام فوق الوصف فوق الخيال كلام لو اجتمع اهل الارض كلهم مش هايكتبوا كلمة منه


استنى كده..


تعالى نعيش مع اسم الله "الحليم" صدقنى هاتتجنن


اتجنن؟ هههه ليه يعنى


اقولك ليه يعنى اصل ربنا مش بس بيسيبك تعصيه وتغضبه وخلاص لأ ده هو اللى بيديلك القوة اللى تعصيه بيها، وكمان يستر عليك عشان ماتقلش من نظر حد، وما بيخليكش بتعمل الذنب ويعاقبك كده فى ساعتها ولا حتى بعدها بشوية لأ دا بيحلم عليك وما بيعجلش بالعقوبة وبيسيبك برحتك كأنه بيقولك "اعمل مهما تعمل اصلك راجع راجع"


وكمان بيوفقك للتوبة ويقبلها منك ويجازيك عليها وكمان يغفر لك اللى فات والاقوى بقى انك لما تتوب ما بيعيركش بذنبك لأ مايرضاش عشان ما يحرجكش ولا يجرحك وسيئاتك يحولها حسنات ويضاعف لمن يشاء


يبقى تقوللى هاتجنن ليه


قول سبحان ربى العظيم الحليم


حسى بأه يا أختى بكلام ربنا وماتقعديش تقرى وولا حسه بحاجه لأ حسى بأه قبل يوم لا ينفع فيه مال ولا بنون


حسيت بمعنى اسمه"الحليم"؟


لو حسيته بجد هاتحس ان اتولد دلوقت فى قلبك الحياء من الله سبحانه جل وعلا هاتتمنى تقرب منه


طيب اللى اتولد ده نكبره ازاى؟


اقولك ازاى انت تتوضا بعد الدرس وتفتح المصحف وتقرأ من البداية وتستخرج الايات اللى فيها اسماء الله وصفاته وجزئ المصحف ماتقرأهوش مرة واحده يعنى هههههه


بقولك ايه


(اكتب الواجب اللى قلتهولك فى ورقة جنبك عشان ماتجيش بكرة ناسى الواجب)


خلينا فى موضوعنا المهم انك لو عرفت ربنا صح اكيد هاتحبه اوى وهاتلاقى عالم الحب ده عالم تانى مش زى عالم الحب اللى فى الدنيا بتاع نبنى بيتنا طوبة فضة وطوبة دهب وفى الاخر لو اجوزوا يعيشوا فى شقة عادية مبنية بالطوب الاحمر ونبدأ من تحت الصفر وهما اصلا بحالتهم مش هايوصلوا حتى للصفر والحوارات اللى ماتجيبش تمنها دى هاتلاقى حب بيوديك لربنا فا يأمر الملايكة تبنيلك بيت تانى خالص طوبة دهب من دهب الجنة وطوبة فضة من فضة الجنة وكل واحد على حسب عمله


طيب تيجى نشوف السلف قالوا ايه عن حب ربنا:


قالوا المحبة ميل دائم بقلب هائم


وقالوا مراقبة الحبيب فى المشهد والمغيب


انت عارف ان ربنا مطلع عليك دايما طول الوقت صح؟ طيب انت مستشعر العملية دى اقصد يعنى انت حاسس انه جنبك شايفك ومراقبك ولا لأ ؟ طيب بتعمله أيه؟


وقالوا مواطئة القلب لمراد الرب


يعنى ارادتك تبقى ارادته ومرادك يبقى مراده، اصل ده ربنا حبيبك وهواك هو ما يريده مش اللى انت عايزه لأ اللى هو عايزه، وما تخترش حاجه قبل ماتعرف هو اختار ايه وتختاره، دايما تقول لنفسك انا عبد لله يعمل فيا اللى هو عايزه ومهما كان البلاء هاحبه لان ربنا مدام نزله عليا يبقى رايدلى الخير


انك لو انعم عليك بشئ حتى لو اقل من مانت عايز تحمده وتشكره غيرك مش لاقى وغيرك برضه عنده اكتر منك بكتير بس معندهوش نعمة الشكر وافتكر ان ربنا ممكن يديك كل حاجه ويحرمك من معرفته يبقى الابتلاء هنا احسن من اى نعم تانية ويبقى هو فى حد ذاته اكبر نعمة


يعنى مثال لو جيت كده صحيت لصلاة الفجر لو انت بتحبه هاتقول ياااااه يارب هو انا عندك استاهل انى اقوم اصليلك ومعظم المسلمين نايمين الا من رحم الله الف حمد وشكر ليك يارب


ايوة تحمد ربنا انه صحاك بدل ماتنام عن اهم حاجة فى يومك وطبعاً هى تأدية الصلاة فى اوقاتها عارف لو حسيت باللذة دى هاتقطع نفسك فى العبادة وتحس انك مقصر


وقالوا ان تغار على المحبوب أن يحبه غيرك {وَفِي ذَلِكَ فَلْيَتَنَافَسِ الْمُتَنَافِسُونَ}


قال وهيب بن الورد : إن استطعت ألا يسبقك إلى الله أحد فافعل


علشان كده الحب والشوق بيفكوا القيود وبيدوك دافع الإنطلاق مش الشباب بيقولوا كده للبنات الا من رحم ربى طيب ماتحققوا بقى الحب مع ربنا احسن اصل هو ده بقى الحب الحقيقى


لا انا مش بقول كلام اغانى اعاذنا الله انا بقول كلام حقيقة حب ربنا هو بجد اصدق حب


وقال بعض السلف : لو أن رجلا سمع بأن أحدا أطوع لله منه فانصدع قلبه فمات لم يكن ذلك بعجب


وقال رجل لمالك بن دينار : رأيت فى المنام مناديا ينادى "أيها الناس الرحيل الرحيل" فما رأيت أحدا يرتحل إلا محمد بن واسع فصاح مالك بن دينار وغشى عليه


ايوة صح هوا فيه حد سبق وأنا قاعد كده بلعب اقولك ايه يارب


يااااااه ركز معايا كده


فى الدنيا كله قاعد بيقطع فى نفسه عشان الفلوس والخلفة والاستقرار اللى بيقولوا عليه لكن فى الآخرة ناسى نفسه وناسى ربنا ويقولك انا بصلى وربنا رؤوف رحيم المهم اللى فى القلب


تقوله فلان ختم القرءان ما شاء الله ربنا يكرمه وفلان ده صوام وقوام ربنا يزيده


طب وأنت فين؟ ليه فى الآخرة بنكسل وبنرضى بالقليل وفى الدنيا عايزين كل حاجة مالكم بس يا اخوانى وانت يا اختى مالك ليه سايبين طريق ربنا الطريق الابدى وماشيين فى طريق الدنيا الزائل


خلاصة كلامى ان المحبة دى معناها انك تقرب لحبيبك اوى بكل ما فيك بقلبك بعقلك بوجدانك بكل حاجه فيك


انك تستخسر فى نفسك حاجه وتديهالوا


اخت منكم هاتقولى انت ازاى تتجرأى على ربنا وتقولى كده هو ربنا محتاج توبى لله يا اختى


هاقلها لا حاشا لله انا مش اقصد ان حبيبى الله محتاج انا اقصد انى اترك اى شئ فى سبيله "من ترك شيئاً لله عوضه الله خيراً منه" مش ده كلام حبيبنا محمد صلى الله عليه وسلم


انك تمشى على كلام ربنا فى السر والعلن


انك مهما حبيته تبقى عارف انك مقصر فى حبك ليه وتقول زى الملايكة سبحانك ربنا ما عبدناك حق عبادتك


دلوقت بقى انت شايف انك بجد بتحب ربنا ولا مفهوم الحب عندك اتغير ولسه هاتستشعره من جديد؟


طيب تيجى ناخد واجب عملى عالموضوع ده؟


اكتب فى ورقة كل الحاجات اللى تركتها لله فى حياتك وخلى بالك لله مش تركتها وانت عارف انك هاتجيلك حاجه تانية لا تركتها لله ورجيت منه هو العوض


قوللى مفيش مرة كده كنت تعبان ومكسل لكن بالرغم من كده قاومت وآثرت محبة ربنا ونزلت صليت فى الجامع؟


طيب مفيش مرة اصحابك عزموك على خروجه او فرح ورفضت عشان تقعد تصلى القيام او تقرا قران؟


حل الواجب من غير غش عشان انت اللى هاتصححه يبقى مفيش داعى للغش هههههه





وده سؤال للكل بالله عليك مش مشتاقله دلوقت؟ نفسك تشوفه صح؟ حاسس انه واحشك؟ اشتقتله؟


ساعات بتقولوا لنفسكم ياااااه امتى بقى نقابلك ونشوفك امتى بقى نخلص من الهم اللى احنا عايشين فيه


نفسك تشوفه زى سيدنا موسى عليه السلام ما التقى بمولاه عز وجل قال {وَعَجِلْتُ إِلَيْكَ رَبّ لِتَرْضَىَ} وما كاد الا ان قال له {رَبّ أَرِنِيَ أَنظُرْ إِلَيْكَ} يعنى خلينى اشوفك يارب نفسى اشوفك يارب


وانت مش نفسك تشوفه؟


بس بتيجى فكرة تقطع كل ده تلاقى حاجه جواك بتقولك انت بتقول ايه تقابله يعنى تموت وانت عليك الذنوب دى كلها دانت داخل جهنم حدف تلاقى اشتياقك ليه بيقل والفكرة المسيطرة انك عايز تعيش يمكن تتوب


ودرسنا ده عشان عايزين نلغى الفكرة المحزنة دى عايزين نقوله نفسنا نشوفك وما تجيش الفكرة دى تانى لاننا حبيناه فعملنا كل اللى يرضيه وبعدنا عن الشهوات وعن الدنيا كلها


زى اسيا مثلاً كان عندها المعنى ده عميق فقالت {رَبّ ابْنِ لِي عِندَكَ بَيْتاً فِي الْجَنّةِ}


زى ما بيقولوا اختارت الجار قبل الدار وما اعظم الجار وما اطيب الدار


والدليل على الشوق ده موقف النبى لما نزل عليه المطر قال"حديث عهد بربه..حديث عهد بربه"


يعنى ده لسه نازل من عند ربنا طازة نازل دلوقت حالا


وغير كده لما كان الرسول على فراش الموت وابو بكر بيبكى وعائشة تبكى لكن هو رافع السبابة وبيقول "بل الرفيق الاعلى ..بل الرفيق الاعلى"


احنا عايزين ايه من الدنيا ما كفاية دنيا بقى خلينا نكبر ونحس احنا واخدين منها ايه نهايتها كفن وقطن مهما اكلنا ومهما شربنا ومهما نمنا ومهما قضينا شهوتنا دى دنيا يعنى انت راكب عربية عشان تروح بيها الشارع اللى ورا بيتكم هاتنتهى هاتنتهى


شوف ربنا قال ايه عن سيدنا ابراهيم عليه وعلى نبينا الصلاة والسلام {إنّ إِبْرَاهِيمَ لأوّاهٌ حَلِيمٌ}


بعض المفسرين قالوا معنى حلو أوى للايه قالوا ان أواه يعنى شكاء مأخوذه من الشكوى


طيب هو بيشتكى ايه ؟ بيشتكى أذى الناس


حليم : كان حليم عليهم


فقالوا : لم يكن يشتكى أذى الناس فقط كان يشتكى زفرة قلبه من الشوق إلى جمال ربه يعنى بيشتكى إنه مش شايفه


يارب اكتب لنا رؤيتك يارب


والواجب العملى للشوق : استخراج آيات الشوق فى القرءان ونعيشها ونطلع المعانى منها زى ما حسيناها


طلعها بإحساسك وعيشها بقلبك قوله دايما نفسى اشوفك يارب قربنى ليك يارب اقبلنى يارب بحبك يارب


خلى شعارك دايما "اللهم لا تحرمنى رؤية وجهك الكريم"


اللهم ارزقنا سجدة عند سدرة المنتهى.





والان انتهى الدرس وادعوا الله ان تكونوا قد استفدتم منه شيئاً


انتظروا الدرس القادم غداً بإذن الله


استودعكم الله الذى لا تضيع ودائعه


سبحانك اللهم وبحمدك نشهد أن لا إله إلا أنت نستغفرك ونتوب إليك

أحبكم فى الله




والسلام عليكم ورحمة الله وبركات

[مرسى الإيمان]

بارك الله فيكِ أخيتي جعلها الله في ميزان حسناتكِ

[عبدالله الكعبي]

بارك الله فيك و جزاك الله خيرا على الموضوع